善忘哥(& Masta Mic)

作词：ToNick．Masta Mic
作曲：Siugwai & HangJai @ ToNick
编曲：ToNick．
监制：ToNick．赵增熹

Masta Mic：
细个嗰时　有日有个哥哥行过
佢话要教我　做个醒目嘅细路歌　仲话第一课　事情只在乎结果
第二课就系　要活得得过且过　记住无利益嘅　(咪理咁多)
无着数嘅　(咪记咁多)
越大个就忘记得越多　直到我忘记自我
个个都叫我善忘哥

Masta Mic & ToNick：
你最爱边个　(eh　我最爱呀…嗰个好似)
你最撑边个　(嗱　我我我…记得㗎　我记得㗎)
咁你最憎边个　(哎…呀　我真系…)
喂　咁你你系边一个

我就系善忘哥
七百万个善忘哥　一讲钱底线就无咗　(有钱有面仲边使理底线)
懒理自己畀边个恰过
今日仲喺到搏火　听日就唔记得咗　(人大个代表无咗自我)
最尾就好似无出现过

Masta Mic：
善忘哥我最叻系忘记
寻日嘅事今日就会记唔起
唔想记　唔想理　唔使记　唔使理
总之唔想记起嘅事　我就会记唔起
你有乜记得　又　有乜唔记得
你估下善忘哥　唱善忘歌　系为乜
讲讲下　我连啱啱噏过乜　都唔记得
咁呢只歌我仲唱嚟做乜

Masta Mic & ToNick：
你有无开心过　(eh…)
你有无伤心过　(哎…唔好成日问呢啲啦)
咁你有无尽力过　(啊　嗰嗰次…嗰次呀　嗰…同呀…)
咁你系边一个

我就系善忘哥
七百万个善忘哥　一讲钱底线就无咗　(有钱有面仲边使理底线)
懒理自己畀边个恰过
今日仲喺到搏火　听日就唔记得咗　(人大个代表代表边个)
最尾就好似无出现过

细细个你有无谂过想做边个　我唔记得咗
大个咗你又点解会无火　我唔记得㖞

答应过最爱嘅嘢你有无做过　我唔记得咗
瞓喺身边嗰个又系边个　我唔记得㖞

有无谂过边个养到你咁大个　我唔记得咗
有无试过嫌佢两个囉唆　我唔记得㖞

求求其其咁过又系咪最好过　我唔记得咗
有得拣嘅自由有无争取过

吓　咁我咪善忘哥

七百万个善忘哥　一讲钱底线就无咗　(有钱有面仲边使理底线)
懒理自己畀边个搕过
今日仲喺到搏火　听日就唔记得咗　(人大个代表唔代表我)
最尾就好似无出现过
善忘哥唱善忘歌
Masta ToNick　同你上一课

人生有太多嘢可以错过　错过过去嘅过错只会越错越多　唔记得唔代表无发生过
最错系你　忘记　自己系边个