無講的話

《無講的話》Bô Kóng ê Uē
林美美Lîm Bí-bí

想著講袂出的一句話
siūnn-tio̍h kóng buē tshut ê tsi̍t-kù uē
寫佇猶未寄的彼張批
siá tī iáu-buē kià ê hit tiunn phue
看著時間直直飛
khuànn-tio̍h sî-kan ti̍t-ti̍t pue
閣囥佇心肝仔底
koh khǹg tī sim-kuann-á-té

毋是阮的個性驚歹勢
m̄-sī gún ê kò-sìng kiann pháinn-sè
毋是對你的愛出問題
m̄-sī tuì lí ê ài tshut-būn-tê
恐驚這款心內話
khióng-kiann tsit khuán sim-lāi uē
愈講就愈假
jú kóng tiō jú ké

雙人若來行仝齊
siang-lâng nā lâi kiânn kāng-tsê
毋免咒誓也坦白
m̄-bián tsiù-tsuā iā thán-pe̍h
若是決心來反背
nā-sī kuat-sim lâi huán-puē
金山銀山
kim-suann gîn-suann
袂當挽回
buē -tàng bán-huê

雙人若來行仝齊
siang-lâng nā lâi kiânn kāng-tsê
毋免計較袂怨戚
m̄-bián kè-kàu buē uàn- tsheh
若是注定是你的
nā-sī tsù-tiānn sī lí ê
愛你偌濟
ài lí guā-tsuē
就免後悔
tiō bián hiō-hué